Serbiya Prezidenti: "Biz divara qısnanmışıq”

Serblərlə kosovalılar arasında vəziyyət gərgin olaraq qalır

"Biz divara qısnanmışıq. Bu, Serbiya Prezidenti olduğumdan bəri mənim üçün ən ağır gündür".

Aleksandar Vuçiç bunu ötən bazar günü Milli Təhlükəsizlik Şurasının iclasından sonra deyib. O, sülhü qoruyacağına söz verib, lakin ordusunun qismən tanınan Kosovadakı serb azlığını qorumağa hazır olduğunu bildirib.

“Qərar verməzdən əvvəl xəbərdarlıq vermək və onları xəbərdar etməkdən başqa sülhü qorumaq üçün milyon dəfə cəhd edəcəyik”, - deyə dövlət başçısı söyləyib.

Kosovanın şimalında daha bir gərginlik dekabrın 10-da keçmiş serb polisi Deyan Pantiçin regionun hakimiyyət orqanları tərəfindən həbsi fonunda baş verib. O, Kosova polis əməkdaşlarına hücumlarda şübhəli bilinir.

Pantiç bir çox digər etnik serblər kimi, Priştinanın müharibədən əvvəlki serb avtomobillərinin nömrələrini qadağan etmək qərarına etiraz olaraq noyabrın əvvəlində istefa verib. Pantiçin saxlanmasına cavab olaraq, Kosova serbləri ölkənin şimalındakı yolları ağır maşınlarla bağlayıb və Serbiyaya doğru iki əsas sərhəd keçidindən keçən nəqliyyatı dayandırıblar.

Kosovanın Mitrovitsa şəhərində hava hücumu sirenləri səslənib. Atışma qeydə alınıb.

Kosovanın Baş naziri Albin Kurti etirazçıları “cinayətkar dəstələr” adlandırıb və serblərdən bazar günü axşama qədər barrikadaları aradan qaldırmağı tələb edib. Əks halda, o, Kosova polisinin iştirakı ilə səddi aradan qaldırmaq üçün əməliyyat keçiriləcəyi ilə hədələyib.

Vuçiç, öz növbəsində, etnik azlığı qorumaq üçün Kosova və Metohiya ərazilərində minə qədər serb polisi yerləşdirmək niyyətində olduğunu açıqlayıb.

Lakin iyirmi il əvvəl bağlanmış sülh sazişinə zidd olduğu üçün, müvafiq sorğunun NATO missiyası tərəfindən rədd ediləcəyi ehtimal edilir.

(Euronews)