Dünya yenidən “çörəklə imtahan” qarşısında

Rusiya “taxıl anlaşması”nı birtərəfli qaydada pozub

Rusiya Türkiyənin vasitəçiliyi ilə Ukrayna ilə imzalanmış “taxıl saziş"ində iştirakını dayandırdırdığını bəyan edib. Rusiya Müdafiə Nazirliyinin yaydığı açıqlamada bu qərarın Rusiyanın Qara dəniz donanmasına və mülki gəmilərinə qarşı Ukraynanın həyata keçirdiyi hücuma görə verildiyi bildirilib.

Bu, bəhanədir. Rusiya Prezidenti Vladimir Putin “taxıl anlaşmasından” narazı qaldığını bir neçə dəfə səsləndirib. Kreml sahibi zorən imzaladığı anlaşmadan çıxmağa hazırlaşırdı. Onun sözlərinə, görə guya Ukrayna taxılı vəd verildiyi kimi ərzaq problemi olan üçüncü dövlətlərə deyil, Avropa ölkələrinə satılır.

Putin Ukrayna taxılının hansı ölkələrə satılması prosesinə də nəzarət etmək istəyir. Putin “taxıl anlaşmasından” çıxmaqla tərəfdaşı Türkiyə Prezidenti Rəcəb Tayyib Ərdoğanı pis vəziyyətdə qoyub. Bu anlaşmanın imzalanması üçün Ərdoğan xeyli çalışıb və əldə edilən nəticəni öz xanasına yazıb. İndi isə haqqında uğur kimi danışdığı “taxıl anlaşması” tərəflərdən birinin qərarıyla ləğv edilir.

Ərdoğan “taxıl anlaşması” pozulmasın deyə Moskva və Kiyevə zənglər etmək və tərəfləri yenidən razı salmaq məcburiyyətində qalacaq. Çətin prosesdir. Bir-biri ilə müharibə aparan və bir-birinin ərazilərini bombalayan iki dövlətin sülh olmadan “taxıl anlaşmasına” riayət edəcəyi problematikdir.

Müəllif: Elxan Şahinoğlu (politoloq)

Mənbə: "Facebook"