“Putin beynəlxalq tribunaldan qaça bilməyəcək”

Kərim Xan: “Bu, Hollivud filmi deyil, bu, bir növ dram da deyil…”

Əgər sübutlar və dəlillər onun günahını danılmaz şəkildə sübut edərsə, Rusiya Prezidenti Vladimir Putin müharibə cinayətlərinə görə mühakimə olunmaqdan yaxa qurtara bilməyəcək. Bunu “Euronews” telekanalına müsahibəsində, hazırda Ukraynada bu cür cinayətlərin törədildiyi yerlərdə istintaqla məşğul olan Haaqa Beynəlxalq Cinayət Məhkəməsinin Baş prokuroru Kərim Xan deyib.

O bildirib ki, yüksək vəzifə Rusiya Prezidentinin cəzasız qalmasına kömək etməyəcək: “Nə ali əmrlərə istinad etmək, nə də bir şəxsin general, Prezident və ya Baş nazir kimi rəsmi mövqe tutması onu məsuliyyətdən azad etmir - bütün bunlar toxunulmazlıq üçün əsas rolunu oynamır, belə beynəlxalq cinayətlərdə şübhəli bilinən şəxslərin toxunulmazlığı yoxdur.  Nürnberq Tribunalının prinsiplərindən biri budur ki, müharibə cinayətləri və ya insanlığa qarşı cinayətlər üçün heç bir məhdudiyyət müddəti yoxdur”.

Putin və Rusiya Ukraynanın müxtəlif bölgələrində mülki əhalinin zorlandığı, işgəncələrə məruz qaldığı və qətlə yetirildiyi, hərbi silahla və ya silahsız qətliam edildiyi yerlərdə hərbi cinayətlər törətməkdə ittiham olunur. Beynəlxalq Cinayət Məhkəməsinin prokuroru deyir ki, bütün bunların həqiqət olduğu üzə çıxarsa, qəbuledilməz elan edilməlidir: “Bir şey aydındır - mülki obyektlərə, məktəblərə və xəstəxanalara, mülki şəxslərin yaşayış yerlərinə qəsdən zərbələr endirmək, bu insanlardan və obyektlərdən açıq-aşkar hərbi üstünlük əldə etmək üçün istifadə edilmədiyi halda mümkün deyil”.

Kərim Xan həmçinin Ukraynadakı mövcud vəziyyəti nəzərə alaraq beynəlxalq hüququn artan əhəmiyyətinə və ona ciddi riayət olunmasına işarə edir: “Hesab edirəm ki, qanun öz rolunu oynamalıdır. Bu, dünyanın bütün problemlərini həll etməyəcək, lakin indi şahidi olduğumuz kritik anlarda buna arxalanmalıyıq. Onlar bizim hamımızı narahat edir. Bu, Hollivud filmi deyil. Bu, bir növ dram deyil. Bu, çoxlarına yaxın və şəxsi bir şeydir”.

Beynəlxalq Cinayət Məhkəməsinin prokuroru və onun 6 Avropa İttifaqı (Aİ) ölkəsindən olan birgə istintaq qrupu hazırda Aİ-nin məhkəmə əməkdaşlığı agentliyi olan “Eurojust”-un himayəsi altında Ukraynada hərbi cinayətləri araşdırır.

(Euronews)