Türkiyə XİN: “Qurani-Kərim”in yandırılması nifrət cinayətidir
Avronews 
“İsveç hakimiyyətini bu nifrət cinayətini törədənlərə qarşı lazımi tədbirlər görməyə çağırırıq”
Türkiyə Xarici İşlər Nazirliyi (XİN) İsveçin paytaxtı Stokholmda, Türkiyə səfirliyinin qarşısında müqəddəs "Qurani-Kərim"in yandırılmasını qətiyyətlə pisləyir. “Avronews” xəbər verir ki, bu barədə Türkiyə XİN bəyanat verib.
Bəyanatda deyilir:
“Müsəlmanları hədəf alan və müqəddəs dəyərləri təhqir edən anti-islam təxribat xarakterli hərəkətə ifadə azadlığı adı altında icazə verilməsi qəbuledilməzdir, bu, bir nifrət cinayətidir. Bu alçaq hərəkət həm də Avropada islamofobiya, irqçi və ayrı-seçkilik cərəyanlarının həddi-büluğa çatdığının daha bir göstəricisidir.
İsveç hakimiyyətini bu nifrət cinayətini törədənlərə qarşı lazımi tədbirlər görməyə və islamofobiyaya qarşı bütün ölkələr və beynəlxalq təşkilatlarla həmrəy olaraq konkret tədbirlər görməyə çağırırıq”.
Qeyd edək ki, bu gün danimarkalı ekstremist sağçı partiya “Ştram Kurs”un sədri Rasmus Paludan Türkiyənin Stokholmdakı səfirliyi qarşısında “Qurani-Kərim”i yandırıb. İsveç polisi hadisəyə müdaxilə etməyib.
