“Sizin üçün ölümə gedirik, amma haqqımızı vermirsiniz” – Qəzəblənmiş çuvaşlar

“Dövlətimiz Vladimir Putinin bizə vəd etdiyi 195 min rubl məbləğində pulu ödəməkdən imtina edir”

“Qəzəblənmiş Çuvaşiya” adlı “Telegram” kanalı xəbər verir ki, OMON və Milli Qvardiya etirazçıları sakitləşdirmək üçün təlim mərkəzinə gəlib. Onun mənbələrinin sözlərinə görə, səfərbər olan vətəndaşlar saxlanma şəraitindən və vəd edilən nağd ödənişlərin olmamasından narazıdırlar.

Təlim mərkəzində atıcılıq dərsləri çərşənbə günü ləğv edilib. Silah otaqları bağlanıb və möhürlənib.

"Biz öz həyatımızı riskə ataraq, sizin təhlükəsizliyiniz və dinc həyatınız üçün qəti şəkildə ölümə gedirik! Dövlətimiz Vladimir Putinin bizə vəd etdiyi 195 min rubl məbləğində pulu ödəməkdən imtina edir! Onda niyə biz bunun uğrunda mübarizə aparmalıyıq - əgər dövlət ailəmizə heç bir kömək etmirsə?!", - deyə kanal Çuvaşiyadan olan hərbçilərin müraciətindən sitat gətirir.

Etirazçılar deyirlər ki, onlara vəd olunan məbləğ ödənilənə qədər döyüşlərdə iştirakdan imtina edirlər. Hərbi polis tərəfindən saxlanılan insanlar var.

Təlim bölməsindən çəkilən videoda hərbçilərdən biri deyir ki, toplanış məntəqəsinə çatan kimi hərbi komissarlıqda ona 300 min rubl pul vəd olunub. Məmurlar izah edirlər ki, o, bu pulu almayacaq, çünki bu məbləğdə birdəfəlik ödəmə haqqında qanun layihəsi Rusiya Federasiyasının Dövlət Dumasında birinci oxunuşdan kənara çıxmayıb.

Çuvaşiyanın rəhbəri Oleq Nikolayev Ulyanovsk təlim mərkəzində etirazlar başlayan gün Moskvada mətbuat konfransı keçirərək, regionda qismən səfərbərliyin “bitdiyini və ştat rejimində davam etdiyini” deyib. Onun sözlərinə görə, iş “kifayət qədər yüksək səviyyədə aparılıb, bütün hədəf göstəricilərə nail olunub”.

“Biz də ilkin olaraq bir çox rayonlardan nümunə götürərək, qismən səfərbər olan hər bir şəxsə birdəfəlik müavinətin ödənilməsi variantını nəzərdən keçirdik. Ancaq mövcud vəziyyəti təhlil edərkən bazarda uşaqlar üçün zəruri olan ləvazimatların ciddi çatışmazlığını qeydə aldıq. Biz ehtiyat fonddan təxminən 100 milyon rubl ayırdıq və hər bir səfərbər olunan üçün mərkəzləşdirilmiş qaydada əlavə avadanlıq aldıq”, - deyə Nikolayev baş verənləri rayondan birdəfəlik ödənişlərin olmaması ilə əlaqələndirib.

Oktyabrın sonunda Rusiya Federasiyasının Prezidenti yanında Vətəndaş Cəmiyyətinin İnkişafı və İnsan Hüquqları Şurasının üzvü Kirill Kabanov bildirib ki, “səfərbər edilmiş insanlara qarşı ən çox rast gəlinən problemlər, pozuntular arasında yaşayış şəraiti və təminat, o cümlədən pul və yeməkdir”.

Rusiyada qismən səfərbərlik sentyabrın 21-də Prezidentin fərmanı ilə elan edilib. Oktyabrın 28-də Rusiyanın müdafiə naziri Sergey Şoyqu Vladimir Putinə onun başa çatması barədə hesabat verərək deyib ki, “300 min nəfərlik müəyyən edilmiş tapşırıq yerinə yetirilib”. Nazirin sözlərinə görə, səfərbər edilmiş 218 min vətəndaş təlim keçir, 82 min nəfər döyüş bölgəsinə gedib.

(Euronews)