Azərbaycanı korrupsiyada ittiham edən deputat daha bir ay həbsdə qalacaq
Avronews 
Brüssel məhkəməsi Kaylinin vəkillərinin elektron qolbaqdan qabaqlayıcı tədbir kimi istifadə etmək tələbini rədd edib
Dəfələrlə Azərbaycan hakimiyyətini korrupsiyada ittiham edən Eva Kayli Belçika həbsxanasında qalır: Brüssel məhkəməsi onun vəkillərinin elektron qolbaqdan qabaqlayıcı tədbir kimi istifadə etmək tələbini rədd edərək, Avropa Parlamentinin deputatının həbs müddətini bir ay uzadıb.
Prokurorluğun məlumatına görə, qərardan 24 saat ərzində apellyasiya şikayəti verilə bilər. Vəkil Mixalis Dimitrakopoulos “Mega TV”-yə bildirib ki, siyasətçi apellyasiya şikayəti verməyi planlaşdırmır.
Dekabrın 13-də vəzifəsini itirən yunan sosialistlərinin 44 yaşlı ulduzu və Avropa Parlamentinin keçmiş sədr müavini Qətərlə korrupsiya əlaqələrində şübhəli bilinir. Kaylidən başqa daha üç nəfərə qarşı “cinayətkar təşkilata üzv olmaq”, “çirkli pulların yuyulması” və “korrupsiya” kimi ittihamlar irəli sürülüb.
Ümumilikdə, belçikalı müstəntiqlər axtarışlar zamanı 1,5 milyon avro məbləğində nağd pul müsadirə ediblər.
Xəbər agentlikləri məhkəmə mənbələrinə istinadən xəbər verir ki, Avropa Parlamentinin deputatının mənzilində içərisində 150 min avro dəyərində pul olan çantalar tapılıb. Eva Kaylinin müdafiəsinə görə, siyasətçi onların varlığından xəbərsiz idi və tərəfdaşı Françesko Giorgi tərəfindən "xəyanətə məruz qaldığını hiss edir".
Yunanıstanda cütlüyün ortaq bank hesabına, həmçinin Paros adasında 7 min kvadratmetrlik torpaq sahəsinə həbs qoyulub. Ötən həftə Afina maliyyə prokurorluğu öz araşdırmasına başlayıb.
(Euronews)
