Rusiyadan qaçanlar, tələbələr və təkcə onlar yox: Bakı bahalaşır

Paytaxtda mənzillərin satış və kirayə qiyməti niyə qalxır?

Bakıda mənzillərin kirayəsi və qiyməti bahalaşır. Mənzil kirayəsinin artmasına tələbələrin və bura gələn rusların sayının kəskin artması səbəb olub. Satılan mənzillərin qiymətləri isə başqa səbəbə görə qalxır - tikinti xərclərinin artması təsir edir.

Bakıda kirayə qiymətləri hələ avqust ayında, tədris ili ərəfəsində qalxmağa başlayıb və sentyabrın əvvəli qiymətlərin xeyli artması ilə yadda qalıb. Axı paytaxtımızda kirayə haqqını bir qayda olaraq tələbələr formalaşdırır. Lakin bu il Rusiya faktorunun da təsiri oldu - əvvəlcə sanksiyalar, sonra isə qonşu ölkədə elan edilən qismən səfərbərlik bura köçən rusların sayının artması ilə müşayiət olunur. Paytaxtda kirayə mənzillərə tələbat artır və bunun arxasınca qiymətlər də qalxır.

Daşınmaz əmlak eksperti Ramil Qasımzadə AYNA-ya şərhində deyib ki, ilin əvvəlində 200 manata kirayə verilən mənzillər indi 300-350 manata kimi bahalaşıb: “Dərs ilinin başlaması ilə yanaşı, qiymətlərə Rusiyadan gələnlərin sayının artması da təsir edib – bu faktorlar ev sahiblərinin iştahını artırır. Tələb artdıqca icarə haqqı artmağa davam edə bilər”.

Onun sözlərinə görə, indi ilin əvvəli ilə müqayisədə qiymətlər 100-150 manat artıb: “İlin əvvəlində 300 manat olan 2 otaqlı köhnə tikili mənzilin kirayəsi indi ən azı 400 manata qalxıb. Tələbat axını paytaxtın mərkəzinə düşür - əksər hallarda kirayəçilər Bakıda mənzilləri 3-4 ay müddətinə kirayə verirlər”.

“Lakin tələbələr və ruslar Bakıda yalnız aylıq kirayə qiymətinə təkan verirlər, mənzillərin satış qiymətinə təsir etmirlər. Bu proseslər yerli tikinti bazarına hələ də təsir etməsə də, aylıq kirayə qiymətlərindəki dalğalanmalarda aydın şəkildə hiss olunur. Ən çox bahalaşma təkcə kirayə mənzillərinin qiymətlərində özünü göstərmir. Paytaxtda mənzillərin satış qiyməti nəzərəçarpacaq dərəcədə artıb, lakin bu, rusların gəlişi ilə bağlı deyil. İlkin və təkrar mənzil bazarlarında mənzillərin kvadratının qiyməti müvafiq olaraq 15 və 20 faiz bahalaşıb. Digər məqam isə kiçik ölçülü mənzil fondunun bahalaşmasıdır. Artan tələblə bağlı 100 kvadratmetrə qədər olan mənzillərin qiymətləri xeyli artıb”, - deyə həmsöhbətimiz bildirib.

Mütəxəssis qeyd edib ki, paytaxtda bir kvadratmetrin qiyməti 1500 manatdan 1700-1800 manata qalxıb: “Eyni zamanda qiymətlər mənzillərin ölçüsünə görə dəyişir. Məsələn, Nərimanov rayonunda 100 kvadratmetrlik mənzillər orta hesabla 2 min manata təklif olunur. Eyni ərazidə 200 kvadratmetrdən böyük olan evlər daha ucuz satılır - 1700. Amma sahəsi 200 kvadratmetrdən yuxarı olan mənzilləri 1400-1500 manata tapmaq olar”.

“Paytaxtda ən optimal qiymətlər Xətai, Nizami, Sabunçu və Suraxanı rayonlarındadır. Ən bahalı ərazilər Nəsimi, Nərimanov və Səbaildədir. Orada kvadratın qiyməti 2000 manatı keçir və daha ucuzunu tapmaq çətindir. Baxmayaraq ki, hazırda Xətai rayonunda hər kvadrat üçün 1200-1300 manata təkliflər tapmaq olar. Köhnə yaşayış binalarına gəlincə, Nərimanov rayonunda bir otaqlı mənzil orta hesabla 65-70 min manat, Nizamidə 55-60 min manat, Xətaidə isə 50-55 min manat arasında dəyişir”, - deyə Qasımzadə vurğulayıb.

Müsahibimiz bahalaşmanın səbəbləri arasında tikinti xərclərinin artımını və torpaq sahələrinin bahalaşmasını göstərir.

Çoxmənzilli mənzil fondundan fərqli olaraq, fərdi evlərin qiymətləri, xüsusən də paytaxtın ətraf rayonlarında nəzərəçarpacaq dərəcədə aşağı düşüb. Azərbaycan Rieltorlar Assosiasiyasının icraçı direktoru Elnur Azadovun AYNA-ya dediyinə görə, şəhər kənarında qiymətlərin enməsi koronavirus pandemiyası ilə bağlı proseslərlə izah olunur.

“COVID məhdudiyyətlərinin ortasında əhali şəhərətrafı evləri kirayələyib, kənarda tikilməyə üstünlük verdi. Və bu, başadüşüləndir. Heç kim darısqal şəhər mənzilinə bağlanmaq istəmədi və insanlar təbiətə qaçdılar. Artan tələb təklifi tənzimlədi - investisiyalar bu sahəyə axdı, şəhər ətrafında tikinti başladı. Amma məhdudiyyətlərin yumşaldılmasından sonra bağ evlərinə maraq kəskin şəkildə azalıb. Ona görə də indi periferiyada qiymətlər aşağı düşür”, - deyə Azadov izah edib.