Hava xəbərdarlığı: qar yağacaq, yollar buz bağlayacaq

Qarşıdakı günlərdə hava şəraitinin qeyri-sabit olacağı gözlənilir

Fevralın 7-si günün ikinci yarısından 10-dək Bakıda və Abşeron yarımadasında güclü şimal-qərb küləyi əsəcək. “Avronews” Milli Hidrometeorologiya Xidmətinə istinadən xəbər verir ki, fevralın 10-da külək mülayimləşəcək.

Fevralın 8-də havanın tutqun, axşama doğru yağıntılı olacağı, gecə sulu qara keçəcəyi, 9-da fasilələrlə sulu qar, qar yağacağı gözlənilir. Havanın temperaturunun ötən günlərlə müqayisədə tədricən 5-8° aşağı enəcəyi, 9-10-da gecə və səhər saatlarında 1-3° şaxta olacağı gözlənilir.

Fevralın 7-də gecə saatlarından başlayaraq respublikanın əvvəlcə qərb rayonlarında, günün ikinci yarısında şimal rayonlarında, 8-dən isə əksər rayonlarda yağıntılı olacağı, fasilələrlə sulu qar, qar yağacağı gözlənilir. Dağlıq və dağətəyi rayonlarda yağıntıların intensivləşəcəyi ehtimalı var. Fevralın 10-da yağıntılar tədricən zəifləyəcək.

Şimal-qərb küləyi ayrı-ayrı yerlərdə arabir güclənəcək. Havanın temperaturu ötən günlərlə müqayisədə tədricən 8-10° aşağı enəcək. Fevralın 11-dək yollar buz bağlayacaq.