“Avropa İttifaqı Azərbaycanın əsas ticarət tərəfdaşıdır” - PREZİDENT
Avronews 
İlham Əliyev: “Siyasi münasibətlərin inkişafı baxımından çox yaxşı nailiyyətlərimiz var”
İyulun 18-də Azərbaycan Respublikasının Prezidenti İlham Əliyev Avropa Komissiyasının Prezidenti xanım Ursula von der Layen ilə geniş tərkibdə görüşü zamanı Avropa İttifaqının (Aİ) Azərbaycanın əsas ticari tərəfdaşı olduğunu bəyan edib.
"Səfərinizə görə minnətdaram. Səfəriniz həqiqətən ikitərəfli əməkdaşlığımızın vacibliyini nümayiş etdirir. Çox şadıq ki, Avropa İttifaqı ilə Azərbaycan arasında əlaqələr ikitərəfli əməkdaşlıq, eləcə də Şərq Tərəfdaşlığı çərçivəsində çox uğurla inkişaf edir", - deyə dövlət başçısı bildirib.
Prezident Əliyev siyasi münasibətlərin inkişafı baxımından Azərbaycanla Aİ arasında çox yaxşı nailiyyətlər əldə edildiyini bildirib: “Çox fəal siyasi təmaslar mövcuddur. Bilirsiniz ki, Avropa İttifaqı bizim əsas ticari tərəfdaşımızdır. Əminəm ki, gələn illərdə icrasını planlaşdırdığımız layihələr ticari əməkdaşlığımızı genişləndirəcək”.
“Əlbəttə ki, enerji sahəsində əməkdaşlıq hər zaman gündəliyimizdə üstün yer tutub. Bu gün xüsusən də belədir. Hesab edirəm ki, çox yaxşı nəticələrimiz, nailiyyətlərimiz var. Bu ilin əvvəlində, xanım komissarın səfərindən sonra, biz enerji dialoqunu başlamışıq. Fikrimcə, bu, həmçinin qarşılıqlı marağın çox yaxşı əlamətidir”, - deyə ölkə rəhbəri vurğulayıb.
