Zəngilana daha 20 ailə köçürüləcək
Avronews 
Xüsusi nümayəndə: “Ağalı kəndində bütün infrastruktur və xidmət strukturları, sahələri artıq fəaliyyət göstərir və buranın sakinləri bu sahələrdə çalışır”
Fevral ayının axırı-mart ayının ilk həftələrində Zəngilan rayonunun Ağalı kəndinə daha 20 ailə köçürüləcək. “Avronews” xəbər verir ki, bunu jurnalistlərə açıqlamasında Şərqi Zəngəzur iqtisadi rayonuna daxil olan Cəbrayıl, Qubadlı və Zəngilan rayonlarında Azərbaycan Respublikası Prezidentinin xüsusi nümayəndəsi Vahid Hacıyev deyib.
“2022-ci il ərzində Zəngilan rayonu Ağalı kəndinə 66 ailə, 326 nəfər artıq köçüb və onlar orada yaşayır, işləyirlər. 2023-cü ildə də növbəti köç gözlənilir. İki mərhələdən ibarət olan köç artıq bu ayın axırı, mart ayın ilk həftələrində həyata keçiriləcək", - deyə o bildirib.
Hacıyevin sözlərinə görə, evlərin tikintisi artıq başa çatıb və onlar öz sakinlərini gözləyirlər: “Ağalı kəndində bütün infrastruktur və xidmət strukturları, sahələri artıq fəaliyyət göstərir və buranın sakinləri bu sahələrdə çalışır”.
