Bayden qərarsızdır
![Bayden qərarsızdır](https://avronews.az/uploads/images/2023/02/image_750x_63f3091bcfac8.jpg)
Onun yenidən seçkiyə qatılacağı bəlli deyil
ABŞ Prezidenti Co Bayden siyasi fəallığını artırıb. Ağ Ev sahibi bu ay Konqresdə çıxış edərək, amerikalıları narahat edən mövzular barədə fikirlərini bildirib. Bayden çıxışının əsas hissəsini daxili problemlərə həsr edib. O, inflyasiya ilə mübarizənin vacib olduğunu söyləyib. Co Bayden Amerikada yanacağın qiymətinin yüksək olmasını Rusiya-Ukrayna müharibəsi ilə əlaqələndirib.
Bayden xarici təhlükələrdən danışarkən Çinə daha çox vaxt ayırıb. Onun çıxışında Rusiya-Ukrayna müharibəsi Çin təhlükəsi qədər yer almayıb. Buna baxmayaraq, Bayden Ukrayna qələbə qazanana qədər Kiyevi dəstəkləyəcəyini bildirib.
Təsadüfi deyil ki, Baydenin Konqresdəki çıxışını dinləmək üçün Ukraynanın ABŞ-dakı səfiri parlamentə dəvətli idi. Bayden bu mövzunun davamı kimi Kiyevə səfər edib Ukraynaya dəstəyini artıracağını bildirdi.
ABŞ-da növbəti Prezident seçkisi 2024-cü ildə keçiriləcək. Bayden seçkiyə qatılıb-qatılmayacağı barədə hələ qərar verməyib. 80 yaşlı Bayden üçün növbəti Prezident seçkisi kampaniyası çətin olacaq. O, seçkidə iştirak etmək üçün mükəmməl səhhətə malik olmalıdır.
Bayden haqqında bunu söyləmək çətindir, onun yaddaş problemləri mövcuddur. O, Konqresdə çıxış edərkən senator Çak Şumeri Senatdakı azlığın lideri adlandırıb. Halbuki, ötən ilin noyabr seçkilərinin nəticələrinə görə Şumer çoxluğun lideridir.
Baydeni Çinin artan qüdrəti narahat edir. Deyib ki, Çin iqtisadi və hərbi gücünü o, Ağ Evə gəlməmişdən əvvəl gücləndirib. Yəni Baydenin sözlərindən belə çıxır ki, guya o, Ağ Evdə daha əvvəl olsaydı, Çinin gücünün artmasına mane olardı. Halbuki, ondan əvvəlki Prezident Donald Tramp Çinə qarşı mübarizədə Baydendən daha sərt addımlar atmışdı. Tramp Çinə qarşı sanksiyalar tətbiqini gücləndirmişdi.
Buna baxmayaraq, Bayden Çinin ABŞ-ı üstələməyəcəyini bildirib. Onun bu sözləri Konqresdə həm demokratlar, həm də respublikaçılar tərəfindən gurultulu alqışlarla qarşılanıb. Ancaq Çini durdurmaq çətin vəzifədir.
Müəllif: “Atlas” Araşdırmalar Mərkəzi
Mənbə: “Facebook”