“256 parlamentari əleyhimizə səs verir, bir nəfər də lehinə tapılmır, niyə?” – DEPUTAT

Fazil Mustafa: “Səfirlərimizin bir-iki şəxsi dostu, münasibət quracağı 5-6 adam da yoxdur? Yəni hamı ermənilərin təsiri altındadır?”

“Ötən iclasda Fransa Milli Milli Assambelyasının qəbul etdiyi qərara hamılıqla münasibət bildirdik və orda 256 deputatın səsvermədə etdiyi yaramazlıqlara çox sərt reaksiya ortaya qoyduq. Lakin biz özümüzə aid olan yarıtmazlıq barədə danışmağı unutduq. Bu yarıtmazlıq nədən ibarətdir? İstər Fransa, istər Belçika, istər Almaniya və ya digər ölkələr olsun, necə olur ki, bir parlamentdə 256 nəfər Azərbaycanın əleyhinə səs verir, bir nəfər belə Azərbaycanın lehinə çıxmır?!”.

“Avronews” xəbər verir ki, bu fikirləri Milli Məclisin bu gün keçirilən plenar iclasında deputat Fazil Mustafa səsləndirib.

“30 ildir, orada diplomatik korpusumuz fəaliyyət göstərir. Yəni bu səfirlərin bir-iki şəxsi dostu, münasibət quracağı 5-6 adam da yoxdur? Yəni hamı ermənilərin təsiri altındadır? Ermənilər kimi kiçik bir xalq hamını ələ alıb? Bu, inandırıcı gəlmir. Biz özümüzə aid olan bir sıra məsələləri həll etmədiyimizə görə problemlər yaşayırıq. Bir çox halda bu sahədəki bəzi insanlar qabiliyyətinə görə yox, qabiliyyətsizliyə görə irəli, daha yuxarı vəzifələrə çəkilir”, - deyə o bildirib.

Mustafa xatırladıb ki, dövlət büdcəsindən 20 Yanvar qırğını, Xocalı soyqırımı ilə bağlı tədbirləri keçirməyə və Azərbaycanı tanıtmağa vəsait ayrılır: “Lakin Azərbaycanı bu formada tanıtmağa nə ehtiyac var? Elə Azərbaycanın Prezidenti öz çıxışı, davranışı, apardığı müzakirələrlə ölkəmizi ən yüksək səviyyədə tanıdır. Bunun ayrı-ayrı adamlar tərəfindən edilməsinə ehtiyac yoxdur. Ayrı-ayrı ölkələrdə fəaliyyət göstərən diplomatik korpusumuz həmin ölkələrdə olan səlahiyyətli şəxslər, ictimai fikrə təsir edə biləcək adamlarla əlaqə qurmağı bacarmalıdır. Bir çoxu isə bu qabiliyyətdən məhrumdur. Sadəcə, 5 il vaxtını öldürüb gəlirlər. Onların nə işlə məşğul olduğu soruşulmur?”.