Kreml Ermənistan yükündən qurtulacaqmı?
Avronews 
Ermənistan Rusiya üçün Ukrayna deyil ki, Moskva bu kiçik dövlətə görə Qərbə qarşı yeni cəbhə açsın
İrəvanda erməni və rusiyalı ekspertlərin iştirakı ilə “dəyirmi masa” keçirilib. Erməni saytlarında bəzi çıxışları izlədim. Rusiyalı ekspertlərin ümumi fikri bu oldu ki, Ermənistan hakimiyyəti Rusiyanın əvəzinə Qərbi seçərsə, Kreml bu dövlətə kömək edə bilməyəcək.
Erməni ekspertlər isə əksini bildiriblər: “Bizi Azərbaycanın əlindən ala bilməsəniz, Ermənistanı itirəcəksiniz”.
Erməni ekspertlər həm də ondan narahatlıqlarını dilə gətiriblər ki, Rusiyanın başı Ukraynaya qarışıb, Cənubi Qafqaza nəzarəti azalıb və Kreml Azərbaycana mane olmur.
İrəvandakı “dəyirmi masa”dakı müzakirələrdən çıxan qənaət budur ki, Rusiya Ermənistanın itirilməsindən narahat deyil. Kreml İrəvana seçim imkanı verir. İrəvanın Qərbi seçəcəyi halda, Rusiyanın itirəcəyi bircə Ermənistandakı hərbi bazasını oradan çıxarması olacaq.
Ermənistandakı həmin hərbi baza Rusiyaya yükdən başqa bir şey deyil. Bunun əvəzinə Rusiya qazın qiymətini Ermənistana artıracaq, güzəştli məhsul satışından imtina edəcək.
Ermənistan Rusiya üçün Ukrayna deyil ki, Kreml bu kiçik dövlətə görə Qərbə qarşı yeni cəbhə açsın, o cümlədən tərəfdaş saydığı Türkiyə və Azərbaycanla münasibətləri gərginləşdirsin. Əksinə Rusiya Ermənistan adlı ballastdan imtina etsə, bu, hamının xeyrinə olacaq. Əlbəttə, bu ideal variantdır.
Müəllif: Elxan Şahinoğlu (politoloq)
Mənbə: “Facebook”
