Diqqət: Ermənistana “beyin axını”

On minlərlə mütəxəssis və şirkətin İrəvana daşınması bizə nə vəd edir?

Rusiyanın Ukraynaya təcavüzündən sonra  bu ölkəyə tətbiq edilən sanksiyalar səbəbindən İKT sektorunu böhran bürüdü. Xarici İT şirkətlərin böyük əksəriyyəti Rusiyanı tərk etdi. Rusiyanın işsiz qalan yüz minlərlə İT mütəxəssisinin kütləvi relokasiya prosesləri başladı.

Bəs, Rusiyadan baş götürüb gedən İT mütəxəssis və şirkətlər hansı ölkələrə üz tutub?

Əvvəllər də bu haqda yazmışdım, rusların güclü relokasiya ölkələri fərqliydi. İndi məlum olur ki, 50 000 İT mütəxəssisi, xüsusən də proqramçılar Ermənistana relokasiya edibmiş. Bunu Ermənistanın iqtisadiyyat naziri Kerobyan bildirib.

O, Rusiyadan son zamanlarda yalnız İT mütəxəssislərinin deyil, 20-dən çox İT şirkətinin də Ermənistanda qeydiyyatdan keçdiyini açıqlayıb.

Ümumiyyətlə isə, hazırda Ermənistanda vergi ödəyicisi olaraq 850 Rusiya şirkətinin və 350 fərdi sahibkarın fəlaiyyət göstərdiyini, 40 minədək hüquqi və fiziki şəxsin Ermənistan banklarında hesab açdığını bildirib.

Xatırlayıram ki, bir neçə gün öncə Rusiya bazarından çıxan tanınmış Amerika şirkəti NVİDİA da İrəvanda ofis açdı. Bir müddət öncə “Yandex” də İrəvanda 1000 nəfəri işə cəlb etməklə ofis açmışdı.

Beləliklə, Rusiyanın Ukraynaya təcavüzündən sonra Rusiya İT mütəxəssislərinin və şirkətlərinin relokasiya prosesinin əsas mərhələsinin başa çatdığını düşünmək olar. Müşahidələr göstərir ki, müharibə başlayandan sonra Rusiyadan miqrasiya edən mütəxəssislər və şirkətlər əsasən Özbəkistan, Gürcüstan, Qazaxıstan və Ermənistan bazarlarına üz tutdular.

Relokasiya proseslərində Azərbaycan yer almayıb. Bildiyim qədər bəzi dövlət qurumları bu istiqamətdə Rusiya şirkətləri, İT komandalarla  danışıqlar aparsa da, biznes mühitin cəlbedici olmaması baxımından  uğurlu yekunlaşmayıb.

Azərbaycana Rusiyadan və Ukraynadan yalnız məhdud sayda mütəxəssislərin və ailələrin gəldiyi bildirilir.

Düşünürəm ki, on minlərlə İT mütəxəssisinin, İT şirkətlərinin, eyni zamanda xarici ölələrin İT şirkətlərinin bir anda Ermənistan bazarlarında yer alması və möhkəmlənməsi bizim üçün çox düşündürücü olmalıdır. Fikrimcə, bununla da yaxın perspektivdə bədnam qonşumuzda yeni mühit formalaşacaq - hansı ki, bizim milli maraqlarımıza heç də uyğun olmayan bir mühitdən söhbət gedir.

Adi hesablamalarla proqnozlaşdırmaq olar ki, düşmən ölkə yaxın bir neçə ilə nələr əldə edə bilər. Fikrimcə, bu məsələ bizim üçün yalnız  iqtisadi məsələ olmamalıdır - bu, daha çox  milli təhlükəsizlik məsələsidir.

Müəllif: Milli İnternet Forumunun prezidenti Osman Gündüz

Mənbə: “Facebook”