Dəhşətli fakt: ana və qızı meyitləri hissələri parçalayıb satırmış

“Acgöz qadınlar insanları dəstəkləmək əvəzinə, onların etibarından sui-istifadə ediblər”

ABŞ-ın Kolorado ştatında keçmiş dəfn evinin sahibi və anası kremasiya üçün hazırlanmış meyitlərin bədən hissələrini qanunsuz olaraq satdıqlarına görə uzun müddətə azadlıqdan məhrum ediliblər.

İstintaq və məhkəmənin müəyyən etdiyi kimi, 2010-2018-ci illər ərzində Meqan Hess və anası Şirli Kox qohumlarının razılığı olmadan 560-a yaxın meyiti parçalayaraq, hissə-hissə qanunsuz mallar aldıqlarını bilməyən tibbi təhsil müəssisələrinə satıblar.

Bəzi hallarda cinayəti törədənlər hətta bütün bədəni satıblar. ABŞ-da siz orqan və ya əzalarınızı bağışlaya bilərsiniz, lakin onları sata bilməzsiniz.

Nəticədə Hess 20, anası isə 15 il müddətinə azadlıqdan məhrum edilib.

Montrose şəhərində “Sunset Mesa Funeral Home” adlı dəfn evinin sahibi olan Hess əvvəllər kremasiya üçün 1000 dollar alırdı, lakin əvvəlcə yaxınlarına cəsəd hissələrinin əvəzində mərhumu pulsuz yandırmağı təklif edirdi.

Eyni zamanda, məhkəmə prosesində məlum olduğu kimi, hətta qohumlar imtina etdikdə belə, bədən hissələri, o cümlədən qollar, ayaqlar və başlar Hessə məxsus olan “Donor Services” vasitəsilə saxta donor sənədləri yolu ilə satılıb.

Sonradan Hess dəfn evinin xidmətlərindən istifadə edən bəzi şəxslərə məlum olub ki, onlara qohumunun külü ilə yad adamların külü qarışmış qablar verilib.

FTB-nin xüsusi agenti Leonard Karollo rəsmi açıqlamada deyib: "Bu iki qadın yas və kədər anında onlara müraciət edən qurbanların zəifliyindən istifadə etdilər. Və bu acgöz qadınlar bu insanları dəstəkləmək əvəzinə, onların etibarından sui-istifadə ediblər”.

Cinayət “Reuters” jurnalistlərinin araşdırması sayəsində açılıb. Bundan sonra FTB 2018-ci ildə dəfn evinə basqın edib.

Hökm çıxararkən hakim Christine Argüello bunun indiyə qədər məşğul olduğu ən emosional iş olduğunu söyləyib və hər iki cinayətkarın dərhal həbsxanaya göndərilməsini əmr edib.

(BBC)