Bakıda Dünya Kuboku üçün hazırlıq işlərinə start verilib
Avronews 
Sərxan Musalı: “Bu gündən Bakı İdman Sarayında tikinti-quruculuq işlərinə başlayırıq”
“Bakı İdman Sarayında keçiriləcək yunan-Roma güləşi üzrə Dünya Kubokuna hazırlıqlar davam edir. Azərbaycan daha əvvəl sərbəst güləş üzrə belə mötəbər yarışı qəbul etmişdisə, klassik güləş üzrə bu, ilk olacaq”.
“Avronews” xəbər verir ki, bunu jurnalistlərə açıqlamasında Azərbaycan Güləş Federasiyasının mətbuat katibi Sərxan Musalı deyib.
Onun sözlərinə görə, son bir aydır təşkilati işlər davam edir: “Bu gündən isə Bakı İdman Sarayında tikinti-quruculuq işlərinə başlayırıq. İlk olaraq İdman Sarayını güləş yarışları üçün uyğun hala gətirəcəyik. Yəni güləş xalçaları quraşdırılacaq. Daha sonra isə digər texniki qurğular, detallar hazırlanacaq. Böyük monitorlar, bilbordlar və digər lazımi ləvazimatlar yerləşdiriləcək”.
Qeyd edək ki, Dünya Kuboku noyabrın 5-6-da keçiriləcək.
