Azərbaycanda 97 veb-resursa haker hücumu olub
![Azərbaycanda 97 veb-resursa haker hücumu olub](https://avronews.az/uploads/images/2023/01/image_750x_63bc22888f001.jpg)
Kiberhücumların 66 faizi serverlərin boşluğundan istifadə olunaraq həyata keçirilib
“CYBER ON” şirkəti tərəfindən aparılan monitorinqə əsasən, 2022-ci il ərzində “.az” ölkə kodlu informasiya resurslarına qarşı çoxsaylı kiberhücumlar nəticəsində 97 veb-resursa haker müdaxiləsi halının reallaşdırıldığı müəyyən olunub.
“Avronews” bu barədə Xüsusi Rabitə və İnformasiya Təhlükəsizliyi Dövlət Xidmətinin məlumatına istinadən xəbər verir.
Məlumata görə, kiberhücumlar həyata keçirilmiş veb-resursların analizi göstərir ki, onların 34%-də informasiya resursunun düzgün və təhlükəsiz kodlanmaması, 66%-də isə server sazlamalarının düzgün qurulmaması onları hackerlərin hədəfinə çevrilib. Analizlər, eyni zamanda bu veb-resursların 8%-nin təkrar-təkrar hücuma məruz qalmasına baxmayaraq çatışmazlıqlarını aradan qaldırmaq üçün lazımı tədbirləri görmədiyi faktını ortaya çıxarıb.
Kibermüdaxilə halları aşkarlanan veb-resursların ölkələr üzrə statistikasına nəzər saldıqda, onların 51%-nin ABŞ, 15%-nin İngiltərə, 11%-nin Azərbaycan, 8%-nin Almaniya, 7%-nin Rusiya, 7%-nin Estoniya, 1%-nin isə Litvada saxlanıldığı (Hosting) müəyyən olunub.
Kiberhücumların 66%-nin serverlərin boşluğundan istifadə olunaraq həyata keçirilməsini nəzərə alaraq “CYBER ON” bir daha “shared hosting”istifadə edən şirkətləri diqqətli olmaları üçün xəbərdar edir və təhlükəsiz informasiya ehtiyatlarına sahib olmaq üçün proqramlaşdırma (Secure Coding), audit/pentest xidmətlərini təklif edir.